ӘЛФИЯ АВЗАЛОВА

1933 елның 15 гыйнвары – 2017 елның 15 июне

Әлфия Авзал кызы Авзалова Башкортстан АССРның Калтасы районы Яңа Кабан авылында дөньяга килә. Балачактан тулы ятимлек ачысын татый: нәни Әлфиягә нибары 5 яшендә әнисе дөнья куя, әтисе Бөек Ватан сугышында һәлак була. Кызчык ятимә калгач, башта Актаныш районы Актаныш авылында балалар йортында тәрбияләнә, аннан әнисенең апасы аны үзенә ала. Әлфия кечкенәдән музыкага һәвәслеге белән аерылып тора. Әле мәктәптә укыганда – 15 яшеннән үзешчән сәнгать концертларында чыгыш ясый.

Бервакыт авылга Татар дәүләт филармониясеннән атаклы җырчы Рәшит Ваһапов җитәкчелегендә бер төркем артистлар килеп төшә. Әлфия башкаруындагы халык җырларын тыңлап, ул аңарда искиткеч талант булуын әйтә һәм шул елны ук Татар дәүләт җыр һәм бию ансамбле труппасы яшь җырчыны үз коллективына чакыра. Әлфия ансамбльнең солисткасына әверелә. Шул рәвешле, гап-гади авыл кызы әкренләп Татарстан башкаласын яулый. Үзенең концерт төркемен булдыра. Татар мәдәниятендә яңа юнәлеш – татар һәм башка милләт җырларын эстрада жанрында орган, гитара, клавишалы уен кораллары һәм синтезатордан торган “Казан утлары” инструменталь ансамбленә кушылып башкара башлый.

Әлфия Авзвлова репертуарында 500 дән артык җыр туплана, алар арасында 17 телдә төрле милләтләрнең җырлары да кергән. Аның искиткеч зур популярлыгына бер дәлил: ике айлык гастрольләре вакытында 100дән артык концерт биргән очраклары була җырчының. Гастрольләр Советлар Союзының барлык шәһәрләрендә, союздаш республикаларда, соңрак Россия буенча һәм чит илләрдә бара.

2017 елның 15 июнендә Әлфия Авзалова бакыйлыкка күчте. Җырчының иҗатына гашыйк меңнәрчә тамашачысы аны соңгы юлга озатты. Әлфия Авзалова күпсанлы дәүләт бүләкләренә ия: Россиянең атказанган артисты, Татарстанның халык артисты, ике тапкыр “Хезмәт кызыл байрагы” ордены белән бүләкләнгән. “Татарстан Республикасы алдындагы казанышлары өчен” орденына, дәүләт премияләренә ия зат.